قادين و پوليتيك
چاليشمالاري
11 – 14 آراليق٫ 2003 ده آنكارا شهرينده "تورك دونياسي قادينلاري
دوستلوق و دايانيشما٫ 2 ينجي قورولتايي" برپا اولدو. بو قورولتايا
تبريزدن زهره وفايي "قادين و پوليتيك چاليشمالاري" معروضه سىيله
ايشتيراك ائتميشدي. بو معروضه بيرينجي يئري قازاناركن، اوچونجو قورولتايين عومومى
عونواني كيمي ده سئچيلدي .
-----------------------------------------------------------------
تورك دونياسي اؤزونه عاييد بير چرچيوه سي واردير. بو چرچيوه ده ياشاييشا عاييد هر
نه وارسا، يئر آليبدير. آنجاق بئله بير اسكي و ده يرلي دونيانين ايچينده گئده ن
عنعنه لر و ايناملاردا، اوچ حيصصه داها آرتيق گؤزه چارپير: بير- ائكونومى حيصصه
سي، ايكي- باشقا خالقلارلا علاقه ياراتماق حيصصه سي، اوچ- سوسيال و عاييله وي
حيصصه .
بيرينجي حيصصه ده ان اسكي زامانلاردان بري، آتا بابالاريميز چوخ اؤنمله ائكونومىيه
عاييد اولان بؤلوملري ايزله ييب و گونو گوندن يئنىليكلر ياراتماغا هئچ نه دن
اسيرگه مه ميشلر. تورك دونياسينين بو گونكو ماددي وارليقلاري همين يارانميشلاردان
آسيلي اولاراق، هله ده وار بو يولدا داواملي حالدا گئتمكده دير.
ايكينجي حيصصه، دئمك باشقا خالقلارلا علاقه ياراتماق اؤنمي، ايه ر گئچميش سئنه
لرده تكجه قونشو خالقلارا عاييد اولوردو، بوگون ايسه دونيانين هر هاراسيندا و هر
اؤلكه ده ياشايان خالقلار بو آماجدا آختاريليب، تاپيليب و يئني دوستلوقلار
قورولور. بوگون داها سرحد ايشتيراكي اوزه ريندن يوخ بلكي داها اوزاق خالقلار دا،
قيكيرداش اولدوقلاري حالدا و اورتاق منافئعي ايزله ديكلري حالدا، بير دوست كيمي
قبول اولونورلار. يئني عصير بو باره ده البتته يئني طلبلري واردير و تورك
دونياسيندا ياشايان باشچيلار خوصوصىيله بو علاقه لري قوروماغا هر تهرله جان آتيرلار.
اوچونجو حيصصه دئمك سوسيال و عاييله وي حيصصه، ائل طايفا، وطنداش و بو ساياق
ايليشگيلري اولان كسلرين، دوروملاريدير. قادينلار عاييله لرين ان اؤنملي و اساسلي
رولونو داشييان حالدا بو ساحه ده آرتيق يئر آچميشلار. بو ندنه گؤره، قادينلار
حاققيندا يازيلان ياسا و قرارلار بير اؤلكه و بير اؤزه ل ياسايا عاييد يوخ بلكه
يئنه ده هر بير ائلين اؤز عنعنه و عادتي اوزه رينده گئدير. تاسسوفله بو ساحه تكجه
يئردير كي هله ده يئنيليكلري قبول ائتمه يه اؤزوندن چيخار و طلب گؤسترمير. بير
طرفدن طبيعتين قويدوغو قانونلار قادينلار حاققيندا٫ اونلاري، دئمك
قادينلاري، داواملي حالدا بير اؤنملي وظيفه ني داشيماغا مجبور ائد ير. قادينلاردا
اولان اينجه ليك اونلاري بير پارا سرت ايشلردن اوزاق قالماغا كؤنوللو اولاراق
چاغيرير. بير قادين دئييلن زامان ايلك اولاراق اونون عاييله دورومو گؤزه گلير، و
ايلك سورولار يوزده دوخسان فاييز بير قاديندان بئله دير: ائولىسيز مي؟ نئچه
ائولادينيز وار؟ ...حالبوكي بير اركك شخصه راستلاشان حالدا ايلك سورو بئله اولور:
ايشينيز نه دير؟ نه ده چاليشيرسينيز؟ .......
بو سورولار سوسيال عومومى ايسته ييني قاديندان و ارككدن آيدينجا گؤسترير. تاسسوفله
دوغو اؤلكه لرده بو فاييز داها آرتيق گؤرونور. بير قاديندان ايسته ك بئله
سوسيولوژى باخيمدان، اونون اؤز عاييله سينه نه قده ر خئيرلي اولماسي اوزه ريندن
گئدير و ايكينجي سيرادا بير قادينين سوسيال چاليشمالاري گؤزه گلير. طبيعي كي دوغو
اؤلكه لرده و آرتيقجا تورك خالقلار چرچيوه سينده قادينلارين سوسيال چاليشمالاري،
بئله بير چرچيوه يه سيغينماليدير.
سوروجو بير قادين، بئله خالق ايچنده غريبه بير قاديندير! و يا پيلوت بيريسي، يا
لوكوموتيف سوروجوسو، يا بير فابريكا رئداكتورو، يا بير بينا رئداكتورلوغو، يا ....ساييره
بو قرار ايشلر. ائل گؤزونو ترازي ائده رك، قادينلارين عاييله دن سوواي ايشلري داها
ده يرلىسي اؤيرتمه نليك، همشيره ليك، طيبب و بو ساياق ايشلردير. بلكي بونا گؤره ده
پوليتيك ساحه سينده تورك قادينلارين آز فاييزده گؤروروك. بئله آزليق موطلق اولاراق
عاييله دن و ائلدن آسيلي دئييل. بلكه قادينلارين اؤز ايسته كلرينده بو باره ده بير
چوخلو كاهيلليك گؤرونور. پوليتيك دونياسي تام دئيشيكليك احوالات طلب ائدير. ميثال
بو دونيادا چاليشان بيريسي، اؤنجه تامام ساعاتلارين و زامانلارين سربست و آزاد
اولماليدير. پوليتيك دونياسي و ايشي بير اؤزه ل ساعاتلارا عاييد دئييل و هر گون،
هر آن، بئله بير شخص ايش باشيندا اولماليدير. آمما باخيرسان ديگر طرفدن عاييله لرده
اولان شخصلر اؤزلرينه عاييد اولان گون و آنلارين هئچ نه ايله باشقاسينا بوراخماغا
راضي دئييللر، بئله اولور كي بير قادين پوليتيك ساحه سينده چاليشمادا تكجه ايكي
يولو موطلق حالدا سئچمه لىدير: ايش و يا عاييله! اوچونچو اورتاق يول آز گؤرونور،
بئله بير يول آيريميندا دايانان بير قادين، گؤرونور كي عاييله ني، پوليتيك
ايشلريندن اوستون توتور.
قئيد ائتديييم اوچونجو اورتاق يول او زامان اولور كي عاييله نين اركك باشچىسي
اؤزلويونده بير پوليتيك آدامي اولموش اولسون. بئله حالدا او عاييله نين قادينلاري
پوليتيك ساحه سينه چكيلمه يه آرتيق ايمكان تاپيرلار، آنجاق بئله پوليتيك ده
موستقيل ايستكلر يوخ، بلكي همين عاييله باشچىسي ايسته ييندن آسيلي اولماغا مجبور
قالير و هئچ زامان موخاليفت جبهه لره قوشولابيلمير. بو آجي فاكتلاري دئمكدن
پوليتيك ساحه سينده موستقيل چاليشان قادينلاري يئري دانماق ايسته نيلمير، بلكي
بئله قادينلارين سايي بير ائيله آز اولدوغو دئييلمكدير كي هئچ سايا گلمير!
قادينلارين ديگر چتينليكلري پوليتيك ساحه سينده بونداندير كي اونلار بير قادين
اولاراق، جينسه ل لكيرلره و تؤهمتلره آرتيق توش گله بيليرلر. تاسسوفله اركك
پوليتيكچىلرده بئله بير لكير و تؤهمت گؤرونمور و يا دوغرو حالدا بئله سهولر
اولموشسا دا، اونلاري بير تهر باسيريب، اؤرته جكدير. آمما بير قاديني پوليتيك ساحه
سيندن قيراغا قويماق اوچون، بئله بير قارا ياخماقلار و بياض تئرورلار داها اويقون
گؤرونور. طبيعى كي بير قادين هر حالدا، اؤز ناموسو و آبريسينى داها آرتيق قوروماغا
جيددييت گؤسترير. خوصوص دوغو اؤلكه لرده هله دوغرو دئموكراسي اؤز يئريني
آلماديغينا گؤره، پوليتيك ساحه سينده چاليشان هر بير كيمسه، قات قات چتينليكلره
معروض قالماسي، و قادينلار داها آرتيق، هامىيا بللي بير سؤزدور. بئله چتينليكلر
ايه ر بير اركك پوليتيكچىيه عاييد اولورسا عاييله ساريسيندان، خوصوص آناسي و حيات
يولداشي ساريسيندان، چوخ جيددي حالدا ايزله نير و اونا آرخا دورماغي، عاييله
اؤزونه بير گؤره و كيمي سانير، حالبوكي بير قادين پوليتيك ساحه سينده بير چتينلىيه
راستلاشارسا، ايلك اولاراق عاييله نين هده قورخوسو جانيني آلير و ايقتيدار
ايستنطاقيندان قورتولورسا دا، عاييله سورولاريندان قورتولاجاغي يوخدور!!
هپ بو فاكتلار بير يئره توپلاناندان سونرا، باخيرسان بير اوجا قاييم ديوار، بير
قادين و پوليتيك دونياسي آراسيندا دايانير. بو ديواري سينديران و آشان بير قادين
وارسا، اونا اوره كدن آلقيشلار دئمه لىييك!
پوليتيك دونياسيندا يئني فيكيرلر گئتيره ن، يئني حركتلر يارادان قادينلاري، اؤنجه
بيزلر بير قادين اولاراق، آلقيشلاييب و آرخا دورمالىييق. نه دن كي قادينلار بير
اينسان اولاراق، دونيادا گئده ن هر ساحه ده چاليشماغا، باشاريلاري اولدوقلاري
حالدا، ايذينلري اولماليدير، پوليتيك ساحه سي، بوگون حياتدا ان اؤنملي رولو اولان
ساحه، قادينلارا بير چاليشقان كس كيمي يول وئرمه لىدير. آنجاق بئله يولو الده
ائتمه يه گؤره ايلك اولاراق، قادينلار اؤزلوكلرينده ايشتيراك ائتمه ليديلر. سيزجه
بوگون تورك دونياسيندا قاچ قادين پوليتيك ساحه سينده، ايلك سيرالاردا چا ليشيرلار؟
http://www.kitablar.com
http://www.kitablar.org/